Dagupan City – Muling naghatid ng ngiti at pag-asa sa mga batang mag-aaral ang isinagawang Feeding Program sa Dulag Elementary School bilang bahagi ng patuloy na pagsusulong ng mga programang nakatuon sa kalusugan at kapakanan ng kabataan sa Binmaley.
Naging sentro ng aktibidad ang pagbibigay ng masustansyang pagkain sa mga mag-aaral, kasabay ng pagpapakita ng malasakit at pagkakaisa ng iba’t ibang sektor ng komunidad. Layunin ng programa na makatulong sa pagpapabuti ng nutrisyon ng mga bata at mahikayat ang mas aktibong partisipasyon ng komunidad sa mga gawaing nagtataguyod ng kanilang kapakanan.
Nagpaabot naman ng pasasalamat si Mayor Pedro “Pete” A. Merrera III sa lahat ng naging katuwang sa matagumpay na pagsasagawa ng programa, kabilang ang kanyang maybahay na si Ana Marie D. Merrera, First Lady ng Binmaley, gayundin ang mga guro, magulang, at mga boluntaryong naglaan ng oras at suporta para sa aktibidad.
Ayon sa lokal na pamahalaan, patuloy nitong isinusulong ang mga programang nagpapalakas sa diwa ng bayanihan at malasakit upang mas marami pang kabataang Binmalenian ang mabigyan ng pagkakataong lumaking malusog, masigla, at handa sa pag-abot ng kanilang mga pangarap.
