DAGUPAN CITY– Asugatan so duwaran public school teacher kayarin naaksidente diad Barangay Lauren, Umingan, Pangasinan.
Kinabat era yan sikara di Alan Bermudez, kwarentay tres anyos, public school teacher tan residente diad Barangay Lauren, Umingan tan Michelle Lacasandile, bente sais anyos, sakey met ya public school teacher tan manaayam diad Barangay Carayungan Sur dia met ed abitlan baley.
Diad imbestigasyon na saray otoridad, say tricycle ya mamanihuen nen Bermudez so binmangga diad sakey ya truck ya imamaneho nen Gerald Morado, trentay uno anyos, tan residente na Ilagan, Isabela.
Lapud saya, abangga na abitlan tricycle si Lacasandile ya backride na sakey ya motorsiklo ya undadalan met ed saman ya lugar.
Saray asugatan ya public school teacher so inawit diad patambalan legan ya mangagaway imbestigasyon so Umingan PNP diad agawan insidente.
