DAGUPAN CITY– Mansasansian lukas so duwaran gate na San Roque Dam anggano linmeksab lay lebel na danum diman.
Saya so mismon kinompirma ni Odeth Rivero, spokesman na National Power Corporation (NAPOCOR) diad ekslusibon impituyaw ed sikato na Bombo RAdyo Dagupan.
Onong ed opisyal, duwaran gate ni so mansasansian lukas tan manbobolos na danum anggad sayan kaplesan.
Anggaman linmeksab la so lebel na danum imbaga na opisyal ya ituloy da ni so gagaween dan spilling operation anggad naabot so target ya sukat ya 275 masl o mas abeba ni dia.
Inkuwanton diad sayan paraan, nasiguro dan walay suston espasyo so dam tan mas magano ton na-accomodate so unloob ya danum no man bilang unpelag lamet so maksil ya uran diad probinsya.
Iialuan ya diad agew na Miyerkules tan Huwebes so nagnap lan unabeba so lebel na danum diad San Roque dam no iner manlapud 280.07 masl so magmaliw ya 275 masl labat la.
