DAGUPAN CITY– Inatey so sakey ya dumaralos kasumpalan ya abangga na sakey ya 10 wheeler ya dump truck so mamanihuen toyan motorsiklo diad San Fabian, Pangasinan.
Diad imbestigasyon na saray otoridad, agawa so insidente diad karukuyan na kalsada diad Barangay Cabaruan, baley na San Fabian, no iner binmangga diad dump truck ya manmanihuen nen Luciano de Leon, 48-anyos, residente na Barangay Portic, Bugallon, so motorisklo ya mamanihuen nen Willy Lacana, walad suston edad tan residente na Barangay Anonang , San Fabian.
Akagamor na sugat so nanduruman parte laman na biktima tan inawit iyan tampol diad ospital bangbalet ineklaran dead on arrival na saray doktor.
Kaleganan tonya, maswerte met ya akaligtas so backrider na motorsiklo ya si Camelo Gagasa kasumpalan ton tinmaboy manlapud motorsiklo antes ya binmangga ed abitlan truck.
Naaresto na saray pupulis so driber ya si de Leon tan wala natan ed kustodiya na PNP San Fabian.
