Dagupan City – Nagsanib-puwersa ang Department of Trade and Industry (DTI) Pangasinan, sa pamamagitan ng Negosyo Center Bayambang, at ang Lokal na Pamahalaan ng nasabing bayan upang isagawa ang seminar na may layuning palakasin ang kakayahan ng mga maliliit na negosyo sa larangan ng digital marketing.
Dahil sa seminar na ito, nabigyan ng sapat na kaalaman at kasanayan ang mga Micro, Small, and Medium Enterprises (MSMEs) sa paggamit ng digital platforms upang mapalawak ang kanilang mga negosyo.
Ipinakilala sa mga kalahok ang iba’t ibang estratehiya sa social media marketing, tamang paggamit ng e-commerce platforms, at epektibong paraan ng online customer engagement.
Hangad ng DTI Pangasinan at LGU Bayambang na mapalakas ang presensya ng mga lokal na negosyo sa digital na mundo at matulungan silang makasabay sa mabilis na pagbabago ng merkado.
Tinalakay sa seminar ang mga pangunahing konsepto ng digital marketing kabilang ang paggawa ng makatawag-pansing online content, pagbuo ng matibay na brand identity sa internet, at ang tamang pag-handle ng customer inquiries sa pamamagitan ng social media at online selling platforms.
Bukod dito, nagkaroon ng open forum kung saan malayang nakapagtanong ang mga kalahok tungkol sa mga hamon na kanilang kinakaharap sa pagdadala ng kanilang negosyo online.
Nagbahagi rin ang ilang matagumpay na MSME owners ng kanilang mga karanasan at tips kung paano nila napalago ang kanilang negosyo gamit ang digital marketing.
Ayon sa DTI Pangasinan, ang ganitong mga pagsasanay ay bahagi ng mas malawak na kampanya upang matulungan ang mga MSMEs na maging mas competitive, hindi lamang sa lokal na pamilihan kundi maging sa mas malawak na merkado, kabilang ang national at international markets.
