DAGUPAN CITY– Inatey kasumpalan ya nalner diad gagaween ya irigasyon na National irrigation Administration o NIA so sakey ya 56 anyos ya driver diad baley na San Quintin, Pangasinan.
Kinabat so biktima ya si Merlito Cabato, manaayam diad Brgy Lagasit ed abitlan baley.
Onong ed nalan impormasyon, antes na insedente so akiinuman so biktima ed say kuya ton si Marcelo Cabato tan kaaro toyan si William Alonzo diad abong da.
--Ads--
Kasumpalan toya, pinmaway so biktima tan lapud graben inkabuwek tonya nayarin akurinyas tan naplag diad gagaween ya irigasyon na NIA.
Adeskubre labat na saray kapamilya to so bangkay toyan manleletaw diad abitlan irigasyon.
Tuloy so imbestigasyon na saray pupulis ed asalitan insedente.
