DAGUPAN CITY– Imporek na DOH o say Department of Health ya piccolo nin sansia so sangkapeligroson klase na paputok diad bansa.
Saya so impalapag nen DOH Secretary Francisco Duque III diad ekslusibon impituyaw ed sikato na Bombo Radyo Dagupan.
Onong ed kinen Duque, say piccolo so manunaan ya sengegan na pakakadisgrasyaan.
Papayuan toray totoo lautla saray walad kalangweran ya agga manuusar na saray iligal tan isesebel.
Diad kaplesan, anggapo ni nikurit ya inatey bangbalet wala lay sakey ya walad graben kipapasen.
Diad report na DOH, sakey ya 12-anyos ya laki ya manlalapud Cabanatuan City so nakaokolan ya pututan na saray gamet diad kawigin lima kasumpalan ya pangalawan to so five star ya sakey ed saray isesebel ya paputok.
Saya so sankaplimiruan ya fireworks-related injury ya naikurit na DOH natan ya taon.
Diad biek balet na inleksab na bilang na saray firecracker-related injuries natan ya 2018, im palapag nen Duque ya agga ni nayarin mankampante so opisina da ta wala nin sansia iray negosyante ya ananawet so ulo da ya manlalako na saray iligal ya paputok, tan wala ray manuusar nid saya.
