DAGUPAN CITY– Kinerew na Diocese na Nueva Ecija diad kapulisan so tampolan ya pakaresolba na impamaltog tan impanpatey ed kinen Father Marcelino Paez diad baley na Jaen ed abitlan probinsya.
Onong ed kinen Bishop Roberto Mallari, say abitlan pari so aktibo ed pangikukurang na human rights tan kanepegan na saray dumaralos tan maiirap diad probinsya da.
Manilalo iran tampolan ya naresolba so impanpatey ed pari tan napanbayar so walad beneg na inpanpatey.
Kinerew to met ed saray walay anta ed agawan insedente ya mitolongan ed pupulis piyan naitdan na hustisya so impakapatey ed biktima.
No nanonotan, tinombok so luluganan na biktima na apatiran lalaki ya akalugan na duwaran motorsiklo insan iya pinapaltog.
Asabian ni bandad ala-7:45 na labi na saray nanresponding pulis so luluganan nen Paez ya atartar na balay paltog. Arekober na pulisya iray basyo ya iinapen ya balay kalibre .45 ya paltog.
Akabatan ya manaayam diad retirement home ed baley na Santo Domingo so pari tan naimbitaan labat pyan mangawa na misa diad nanduruman lugar.
Si Paez so nanlapud Diocese na San Jose City Nueva Ecija tan coordinator na Rural Missionaries of the Philippines diad Central Luzon.
Kabkabat so 72-anyos ya pari ya unkokontra ed militarization diad Nueva Ecija tan Central Luzon tan manunaan ed pangiiba ed saray biktima na human rights.
