Sino’ng nagsabi na pang-millennials lang ang coding? Isang 89-anyos na lola ang bumida sa tech world matapos makabuo ng isang smartphone app—at talaga namang hinahangaan siya sa buong mundo!
Si Masako Wakamiya, dating empleyado ng isang bangko, ay nagretiro noong 1992. Ngunit imbes na magpahinga lang sa bahay, napansin niyang kulang ang digital content para sa mga matatanda.
Ang solusyon? Matutong gumamit ng computer at, hindi lang ‘yun, gumawa pa ng sarili niyang mobile app! Ang “Hinadan,” ang kanyang obra, ay isang app na nagtuturo sa tamang pag-aayos ng mga manika tuwing Japanese Doll Festival. Hindi lang ito pampalipas-oras—layunin nitong mapanatili ang kulturang Hapon sa bagong henerasyon.
Dahil sa kanyang kahanga-hangang ambag, naanyayahan siyang magsalita sa United Nations at iba’t ibang tech conferences.
Ang pinaka-astig? Nakapag-face-to-face pa siya sa CEO ng Apple na si Tim Cook! Sa kanyang talumpati, iminungkahi niya na gawing mas “senior-friendly” ang iPhone para mahikayat ang mas maraming matatanda na sumabak sa digital world.
Inspirasyon si Lola Masako sa lahat— at pinatunayan nito na hindi hadlang ang edad para matuto at sumabay sa mabilis na takbo ng teknolohiya.
