DAGUPAN CITY – Aga man akapibiang ed saray topnotchers diad 2016 BAR examination maliket si Atty. Alvin Fernandez, datin vice mayor tan datin city administrator diad ciudad na Dagupan kasumpalan ton akapasa.
Diad impituyaw na Bombo Radyo Dagupan ed kinen Fernandez, baleg so pisasalamat to ed Diyos ed say impakapasa tonya.
Inamin ton diad plimiron agew tonya diad UST mankebyew so pagew ro balet asagutan to ray andurukoy ya epet diad bar exam.
Antes tonyan angala na bar exam inkuwanton dakel so plano to diad bilay piyan dakel ni naantan to tan pikakabat ed say pagmaliw ton abogado singa say panlabay ton man-training.
Say imbangat to ed saray manaaral ni tan akagetar ya mieksamin nepeg ya seryosoen so unaan ya agew diad law school.
Imbaga ton say sekreto na agamuran to so manfocus ed pambasa tan aralen so nanduruman kaso piyan mainumay ya natalusan iray ley onong ed nandumaan ya situwasyon.
