DAGUPAN CITY– Manpapaabig nid ospital so sakey ya datin barangasy kagawad ya pinaltog nen kalalapu to diad selebrasyon na Barangay Night diad baley na Bugallon, Pangasinan.
Kinabat so biktima ya si Rheo Sales, 39- anyos, datin barangay Kagawad tan residente na Sitio Socony, Barangay Salasa diad abitlan baley.
Onong ed imbestigasyon na saray otoridad, say biktima, kaibay asawa ton si barangay Kagawad Emma Sales, so kakasempet da lambengat nanlapu ran akisilibra na Barangay Night nen agawa so impamaltog.
Kaepas tod luluganan na say asawa na biktima piyan lukasan komon so gate na abong da, sakey ya aga kabat ya laki so amaltog tan nala ed eges tan pagew so biktima.
Kayari na impanpaltog so tampol ya tinmakas so suspek.
Tampol met ya inawit diad ospital so biktima.
Diad kaplesan tuloy tuloy ni imbestigasyon ed agawan insidente.
