Isang karangalang muling natanggap ng Pamahalaang Lungsod ng Dagupan matapos itong gawaran ng Plaque of Appreciation ng Department of Science and Technology Ilocos Region sa ginanap na 2026 Regional Science, Technology, and Innovation Week dito sa lungsod.
Iginawad ang parangal ni DOST Ilocos Regional Director Dr. Teresita A. Tabaog bilang pagkilala sa Dagupan bilang Science, Technology, and Innovation Partner ng ahensya.
Patunay ito sa aktibong pakikipagtulungan ng lungsod sa pagsusulong ng mga programang nakatuon sa agham, teknolohiya, at inobasyon para sa kapakinabangan ng mga residente.
Nagpahayag naman ng pasasalamat ang pamahalaang lungsod sa DOST, lalo na kay Renato Solidum Jr., DOST Secretary, sa patuloy na pagtitiwala sa Dagupan bilang katuwang sa pagpapatupad ng mga makabagong solusyon para sa komunidad.
