Dagupan City – Mga kabombo! Isa ba kayo sa mga content creator na mahilig gumawa ng extreme challenge?
Aba! Baka dapat na kayong kabahan? Paano ba naman kasi, isang 30-anyos na fitness influencer ang nasawi matapos ang kanyang mapanganib na extreme challenge na kumain ng hanggang 10,000 calories kada araw upang mabilis na tumaba.
Ang layunin ni Dmitry Nuyanzin ay magdagdag ng 50 pounds o 25 kilos sa pamamagitan ng pagkain ng junk food, para sana patunayan sa kanyang mga followers kung gaano kaepektibo ang kanyang ibinebentang weight-loss program kapag nagpapayat siya ulit.
Kabilang sa kanyang daily diet ang pastries at cake sa almusal, halos isang kilong dumplings na may mayonnaise sa tanghalian, at mga burger, pizza, at sitsirya sa hapunan.
Sa loob ng isang buwan, nadagdagan na siya ng 13 kilos. Ngunit bago pa man niya matapos ang challenge, nakaramdam siya ng masama at nagbalak magpadoktor.
Sa kasamaang palad, hindi na siya umabot at pumanaw sa kanyang pagtulog sanhi ng heart failure.
Ayon sa mga eksperto, ang labis na calorie overload (4 hanggang 6 na beses na mas mataas sa normal) at sobrang pagkain ng salty and fatty foods ay nagdulot ng matinding stress sa kanyang mga internal organs, lalo na sa puso, na naging sanhi ng kanyang pagkamatay.
