DAGUPAN CITY– Ituloy na Civil Aviation Authority of the Philippines (CAAP), so imbestigasyon ed say inpakapelag na sakey ya Cessna plane diad Binalonan, Pangasinan.
Saya so kinumpirma nen PSI Romel Sembrano, Deputy Chief of Police na Binalonan Police Station, diad eksklusibong impituyaw na Bombo Radyo Dagupan.
Inkuwanton, pormal da lan impalima diad CAAP so insidente ta sikara so makansakop sayan insidente.
No nanonotan, parehon asugatan so lugan na Cessna plane 152 ya sikara di Capt. Bruce Sinaking, piloto tan residente na Baguio City kaiba so student pilot ya si Marcus Lim, ya nanlapud ciudad na Manila.
Anggaman akaligtar irayan duwa, balet grabe so inpakapoolan na laman da.
Maswerten akapaway so duwaran biktima antes ya nagnap ya apoolan so eroplano.
Tampol met ya inbatik diad patambalan iraya lapud agamoran dan sugat diad nanduruman parte na laman da, balet inyales met ira diad sananey ya ospital ed Manila.
Akabatan ya kaka-pantake-off labat na eroplano ya nanlapud World City College o aviation school ya gawa na pamilya nen Binalonan Mayor Ramon Guico III, nen biglan pinmelag so cessno plane diad taneman na mais dad Brgy. Limmansangan.
Impalapag met nen Sembrano ya anggad natan so aliwan malinew no akin tinmekyap so eroplano no saya kasi so mission flight o training flight.
