DAGUPAN CITY– Maniilalo nin sansia so Veteran election lawyer tan sakey ya kabkabat ya advocate na saray senior citizens ya si Atty Romulo Macalintal ya nagnap lan naaprubaan so Republic Act 10868 o mas kabkabat ya Centenarians Act of 2016.
Saya et pian naitdan ya tampol na insentibo iray senior citizens ya manedad na 80 tan 90 anyos.
Diad ekslusibon impituyaw na Bombo Radyo Dagupan ed kinen Macalintal, impalapag ton akapaloob diad proponi ya saray matatakken ya makaabot ed 80 anyos so nepeg ya naitdan na P30,000 tan kaaruman ya P30,000 no nasabi to ni 90 anyos.
Eter so balansen P40,000 no makaabot ni 100 anyos.
Kaaruman ya P50,000 kada taon so eter ed saray centenarians ya manbilay ni na masolok ya sanlasus taon.
Importante konon naaprubaan tan naamyendaan so abitlan proponi lautla natan tuloy tuloy so itatagey na presyo na saray sasaliwen pati say tambal tan medisina ya ansakit ya liliknaen na saray mairap bilay iran Pilipino lautla saray senior Citizen o matatakken la.
