Naging palaisipan kung paano nakapasok sa mga estanteng siksikan ng malalambot na laruan ng mga katutubong hayop sa isang gift shop ng paliparan sa Australia ang buhay na isang mabalahibong possum na inilalarawan na malaking daga sa puno
Ang possum ay isang maliit, mabalahibong hayop na kahawig ng daga pero mas malaki at karaniwang nakatira sa mga puno.
Unang napansin ng isang pasaherong naglilibot ang isang buhay na Australian brushtail possum na sumisilip mula sa hanay ng mga kangaroo sa display shelf ng tindahan sa departure terminal ng Hobart Airport sa estado ng Tasmania noong Miyerkules, ayon sa airport retail manager na si Liam Bloomfield.
Sa ibabaw ng possum ay may mga bilby namga marsupial na may mahahabang tainga na kahawig ng kuneho—at mga dingo, ang katutubong aso ng Australia. Sa tabi naman ng possum, sa seksyon ng mga kangaroo, ay naroon ang mga Tasmanian devil, isang mabangis na karnibor na pinagmulan ng karakter na si Taz sa mga cartoon ng Warner Bros.
Isang staff ang kumuha ng video ng possum gamit ang kanyang cellphone bago ito naging mailap dahil sa atensyon at tuluyang umalis sa tindahan.
Kalaunan, ligtas na naalis ng mga tauhan ng paliparan ang possum nang hindi ito nasasaktan.
Hindi alam ni Bloomfield kung ano ang nakaakit sa possum upang pumunta sa estante ng mga laruan.
Hindi rin malinaw kung paano nakapasok ang possum sa tindahan at kung gaano ito katagal doon.
Malabong may naglagay dito bilang biro, dahil kailangan pa itong dumaan sa X-ray screening upang makapasok sa secured na departure terminal area.
