DAGUPAN CITY– Dead on arrival diad patambalan so sakey ya misis legan ya asugatan so Punong Barangay na Brgy. Bugtong Bunao diad baley na Mangatarem, Pangasinan kasumpalan na agawan shooting incident.
Kinabat so inatey ya biktima ya si Theresa Vicente ya akenay bala diad bikking legan ya asugatan ed kawanan ya parte na laman to si Punong Barangay Ronald Aquino.
Diad eksklusibon impituyaw na Bombo Radyo Dagupan ed kinen PCI Benjamin Zarate, Jr., hepe na Mangatarem PNP, diad imbestigasyon da, umpapaway ya awalaan na kolkolan diad arap na Brgy. Hall si Aquino tan si Kgwd Philip Vicente.
Kayari dan mankolkol so sinmempet diad abong si Kgwd Vicente bangbalet nen saya so pinmawil so wala lay sukbit ton paltog.
Nanebatan iran dua tan diad saman impaway la nen Vicente so paltog tan imputok to ed si Aquino.
Agga apuruan nen Vicente si Aquino imbes say asawa ton si Theresa so apaltog ya walad benegan na Punong Barangay.
Tampol ya imbatik diad ospital so biktima bangbalet saya so inatey la.
Kaleganan tonya, kaplesan met ya tatambalen si Brgy. Chairman Aquino ya akagamor met na sugat ed ginawan impamaltog diad sikato.
Naantaan ya say nansengegan na kolkolan dan dua so kolkolan ed bini na ilik ya inter na Department of Agriculture.
