DAGUPAN CITY-Patuloy so itatagey na bilang na aray inatey lapud tigdas diad luyag na Pangasinan .
Diad impituyaw na Bombo radyo Dagupan ed kinen John Lee Gacusan, program manager na national immunization program na DOH Center for Health Development diad Region 1 unaabot la ed 17 so bilang na aray inatey ed tigdas diad luyag manlapud Enero natan ya taon.
Saya ed manlapud katibokelan ya 726 ya kaso na tigdas.
Impalapag ton tinmagey met na 881 percent so kaso na tigdas diad rehiyon kumpara ed parehon panahon nen apalabas ya taon.
Diad Ilocos Region say luyag na Pangasinan so akapangikurit na atagey ya kaso ya 589 ya tinombokan na La Union ya 99 legan ya mikatlo so Ilocos Sur ya walay 25 tan Ilocos Norte ya akapangikurit na 13 kaso.
Impalapag nen Gacusan ya nanpawit la so DOH na aray nurse tan doctor diad nanduruman parte na rehiyon piyan untulong ed saray local government units diad saray vaccination activities lautla saray walaan na dakel ya kaso.
Diad biek tonya, base diad listaan na Provincial Health Office o PHO apatira la so nikurit diad luyag lapud tigdas ya pikabiangan na duwara ya manlalapud baley na Mangaldan tan san sakey diad baley na Bani tan ciudad na Dagupan.
