DAGUPAN CITY– Apotot so pigaran gamet na sakey ya barangay tanod kasumpalan ya sinikbat na Samurai na sakey ya abuek ya laki diad ciudad na San Carlos.
Onong ed saray otoridad, sakey ya mangaran na Orlando Bautista, kwarentay nuwebe anyos, walay asawa tan residente na Barangay Mabalbalino diad abitlan baley so apototan na kawanan ya kiking tan palasinsingan kasumpalan ya sinikbat na sakey ya Rico Soriano, trentay otso anyos, walay asawa tan residente diad abitlan lugar.
Unpapaway diad imbistigasyon na pulisya ya aki inuman si Soriano ed saray pigaran barkada to anggad atuluyan ya abuek tan aki-sangsangan diad saray kakaiba to.
Apanbalingan nen Soriano si Bautista ya manbabano labat.
Sinasaksak na suspek so biktima usar so Samurai ya sengegan na inkasugatan to tan apototan na duwaran gamet diad lima.
Akagamor met so biktima na sugat diad say kawanan ya takeb to.
Tampol met ya inawit diad ospital so biktima.
Kaleganan tonya, kaplesan met lan aanapen na saray otoridad so suspek ya tinmakas ya tampol kayari na insidente.
