DAGUPAN CITY– Iilaluan yag magmaliw ya ampetang so Barangay Elections natan ya taon.
Saya so mismon impalapag nen Atty. Marino Salas, Provincial Election Officer na luyag na Pangasinan diad impituyaw na Bombo Radyo Dagupan.
Onong ed kinen Salas, ipapasen dan ampetang ta say barangay election natan so mansisirbin ‘prelude’ na 2019 Elections, kabaliktaran ed saray immunan pankanawnawa no iner nauna komon so National elections ed say bolan na Mayo tan unsublay so Barangay Elections no bolan na Oktubre.
Impalapag to ni nen Salas ya pantataryaan da la so posibilidad ya ikiwala na gulo diad baetan na saray supporters daray kandidato.
Bangbalet imbaga nen Salas ya no panbasian so report na PNP tan AFP ed sikara, anggapo met so ipapasen ya areas of concern natan diad probinsya tan anggapo so nanenengneng dan igagalaw na saray miyembro na New Peoples’ Army ya nayarin makaapekto ed barangay election.
