DAGUPAN CITY– Emosyonal ya inabet na saray kapamilya to so bangkay nen PFC Eddie Cardona Jr. ya taga Bolinao, Pangasinan ya inatey diad Marawi city.
Manlulluwa met ya nantalaran iray residente diad insabi na bangkay na sundalo ya ngalngalin agga makapanisia ed say seben to tan anggapoy takot ya linmaban diad Maute terror group.
Idadayew na saray kabaleyan tonya si Cardona. Agda nalingwanan so inpanbuwis na bilay to para ed bansa.
Anggaman ansakit parad pamilya so nansumpalan na sundalo piliten dan talusan iya lautla inatey iya parad baley.
Kaleganan tonya, diad impituyaw na bombo radyo kalabian, impalapag nen Ronnel Cardona, say pangluwan na agi na inatey na sundalo anggapo ni pinal ya apandisisyunan na pamilya no kapigan so tolor na biktima.
Aalagaren da ni isabi na nobya to ya walad abroad.
Akagetar ya mankasal si cardona balet inatey iya diad patuloy ya labanan diad Marawi City.
