Nalmon inatey lan manleletaw ed danum so aga kabat ya bii diad kailogan na Barangay Dinalaoan, diad baley na Calasiao, Pangasinan.
Onong ed kinen PLT Noel Domalanta, operations officer na Calasiao PNP, tampol ya nanresponde iray imbestigador kasumpalan dan makaawat na report nilirad nalmon bangkay.
Say biktima so papadisiran ya man edad 45 anggad 50 anyos, walay katagey na 5’2″, tan akasulong na andeket ya t-shirt tan andeket ya panleksab ya kawes.
Onong diad imbestigasyon, walay duwaran residente diman ya akalagey asingger diad ilog nen makasingob iray ambanget kanyan ninengneng da no iner so panlalapuan na angon anggad diman da anengneng so bangkay na bii ya manleletaw diad sanum tan apaliberan na water lily.
Onong ed balita, sampot ya anengneng iyan bii limay agew lay apalabas kaleganan ya saya so manaakar paunlad samay direksyon na ilog.
Agda tanton inimano ta say anta da so manirit labat iya.
Unpapaway ed imbestigasyon ya say bangkay so magano lan nabulok.
Anggapo met so senyales ya saya so pinatey ta anggapo met so nalmon sugat diad laman to.
Inpasilong la iya ed postmortem examination na Municipal Health Officer na Calasiao piyan naantaan so sengeg na inateyan to.
