Maaaring maibibigay sa third quarter ng taon ang sertipikasyon para sa komersyal na pagpapalabas ng AVAC African swine fever (ASF) live vaccine mula sa Vietnam, ayon kay Agriculture spokesperson Arnel de Mesa.
Kapag naaprubahan na, magiging available ang bakuna sa mga outlet, tindahan ng biologics, at mga veterinary shop na rehistrado sa Bureau of Animal Industry (BAI).
Malaking dagok ang ASF sa lokal na industriya ng baboy mula pa noong 2019, na nagdulot ng bilyon-bilyong pisong pagkalugi at pagbaba ng populasyon ng mga alagang baboy sa bansa.
Noong nakaraang taon, ang hog production ay bahagyang bumaba sa 1.66 million metric tons mula sa 1.7 million MT noong 2024.
Ngayong Hunyo, walong barangay pa ang may aktibong mga kaso ng ASF.
Samantala, inilunsad din ng Department of Agriculture (DA) ang P140-million Animal Vaccine Development Program upang makabuo ng mga bakunang gawa sa bansa laban sa ASF at foot-and-mouth disease.
Sinabi ni National Federation of Hog Farmers Inc. President Chester Warren Tan na ang komersyalisasyon ng bakuna ay makatutulong upang mapabilis ang pagbangon ng industriya ng pag-aalaga ng baboy.
Idinagdag niya na patuloy ang taunang paglaki ng populasyon ng mga baboy, partikular sa Mindanao, bagama’t mas mabagal sa Luzon.
Ayon kay Tan, nakahanda ang industriya sa posibleng muling pagdami ng mga kaso ng ASF ngayong tag-ulan, binanggit ang mga karanasan sa nakalipas na mga taon at ang patuloy na pagpapatupad ng mga hakbang sa pag-iingat laban sa sakit.
Gayunman, nagpahayag siya ng pangamba sa mababang farmgate price ng baboy, na kasalukuyang nasa pagitan lamang ng P170 at P185 kada kilo, na mas mababa o halos kapantay lamang ng gastos sa produksiyon na umaabot sa P180 hanggang P200 kada kilo.
Aniya, ang makatarungang farmgate price ay dapat mula P200 hanggang P230 kada kilo.
Nagbabala rin si Tan na nakaaapekto sa kumpiyansa at moral ng mga lokal na magbababoy ang patuloy na pagtaas ng pag-aangkat ng karne ng baboy.
