DAGUPAN CITY – Inpasilong la diad imbestigasyon iray bodyguard na pinatey ya si Mayor Antonio Halili na Tanauan City, Batangas.
Kinumpirma iya nen P/Supt. Renato Mercado, Chief of Police na Tanauan City Police Station, diad eksklusibon impituyaw na Bombo Radyo Dagupan kayarin pinaltog so abitlan mayor.
Inkuwanton, dakel so bodyguard to ta say arum ya empleyado na munisipiyo so inala to bilang personal ton tagabantay.
Onong ed kinen Mercado, labay dan nalinewan no akin agda anengneng so posiblen pasakbay diad bilay na mayor.
No nanonotan pinatey diad panamegley na sakey ya sniper shot ed pagew to si Halili legan ya nagagawa so flag raising ceremony diad compound na Tanauan City Hall.
Umpapaway diad initial ya imbestigasyon ya pinmuwesto so suspek diad sakey ya bakanten lote pigaran metro labat so kaarawi diad kulaan ya akaalageyan nen Halili.
Umpapaway met diad imbestigasyon ya sakey ya bala na M14 rifle so akapatey ed say abitlan mayor ya akabat lapud say shame campaign to ed saray nanaerel ya kriminal diad lugar da.
