DAGUPAN CITY– Anggapod suston kanonotan so sakey ya ama nen saksaken toy mismon anak ton grade 6 student legan ya nanaugip diad abong da diad baley na Villasis, Pangasinan.
Diad ekslusibon impituyaw na Bombo Radyo Dagupan ed kinen PCI Brendon Palisoc, hepe na Villasis PNP, inkuwanton nen tepetan na saray imbestigador so suspek ya kinabat ya si Pablito Evangelista ed say ginawa ton impansaksak ed 13 anyos ya biktimang si Ian Dave Evangelista et imbaga ton agto antay ginawa ton krimen.
Diad ginawa nin imbestigasyon, pigaran agew antes na insidente naimano na saray kakanayon to so miduma duman ugali na suspek no iner mabetbet ya akatulala.
Kaleganan tonya, malinis so record na suspek tan agga kaiba diad saray drug surrenderee.
Anggaman untan papanisiaan na manuusar so suspek na illegal ya droga kanyan saya so akagetar ya ipa drug test.
