Dismayado ang Alliance of Concerned Teachers sa bilyun-bilyong halaga ng mga laptops na binili ng DepEd sa pamamagitan ng Procurement Service of the Department of Budget and Management (PS-DBM).
Ayon kay Raymond Basilio, secretary general ng Alliance of Concerned Teachers, napakahirap na itinaguyod ng mga guro ang nakalipas na dalawang taon na pandemya at marami sa kanila ay hindi nabigyan ng laptop computers at marami sa kanila ay umutang pa para lang makabili ng sariling laptop.
Kailangan na managot aniya ang Department of Education o DEPED sa pagwawaldas ng pera.
Marami na sana umanong guro ang nakagamit ng laptop kung tama o maayos ang pagbili ng mga laptop.
Nananawagan din sa kongreso ang ACT na imbestigahan ang pagbili ng mga lap tops computers at iba pang equipment para sa mga guro.
Kasabay nito ay hinamon din niya si VP at DEPED secretary Sara Duterte na patunayan na malinis ang pamamahala ng DEPED at panagutin ang dapat managot.
Matatandaan na umaabot sa P2.4 billion halaga ng mga outdated at mamahaling mga laptops ang binili ng Department of Education (DepEd) para sa mga guro para sa implementasyon ng distance learning sa gitna ng covid-19 pandemic ayon sa Commission on Audit (COA).
Sa annual audit report ng COA para sa taong 2021, nadiskubre ang bilyun-bilyong halaga ng mga laptops na binili ng DepEd sa pamamagitan ng Procurement Service of the Department of Budget and Management (PS-DBM) kahit na maaaari namang makabili ng mas mura at mas magandang options sa merkado.
Saad ng COA na kakaunting laptops lamang ang nabili dahil sa pagbili ng mamahaling mga laptop kung saan nasa mahigit 28,000 mga guro ang nadeprived o hindi nabigyan ng naturang benepisyo.
