DAGUPAN CITY– Angiter na abiso so General directorate of Civil Defence na Saudi Arabia ed amin ya totoo diad Riyadh, Saudi Arabia kaiba ray Pilipino diman antes ya ginawa so siren test o alert drill readiness program natan ya agew.
Saya so impalapag nen International Bombo Correspondent Engr. Petronilo Figueroa, ya mantratrabaho diad Riyadh kayari na naintercept ya ballistic missile na Saudi Air Force.
Say ituturon walad beneg na missile attack et saray rebelde manlapud Yemen ya suportado na Iran.
Onong nid sikato, gawaen so drill ala una na kaaguwan i oras diad Saudi kaleganan ya alasais ed sayan labi oras diad Pilipinas.
Say getma tonya so naitarya ray totoo ed antokaman ya posiblen insidente ya naiter na missile attack diad Riyadh.
Kaleganan tonya, imbaga met nen bombo correspondent Judith Rosario, asawa na sakey ya Pilipinon network engineer diad Prince Sultan Military Hospital diad Riyadh, ya akaawat met ira na parehon text message ya manlalapud General directorate of Civil Defence nilirad abitlan pamaakaran.
Imbaga diad Bombo Radyo Dagupan nen Rosario ya anggaman natatakot ira so impasa-Diyos da la so kaligtasan da.
Diad biek tonya so normal nin sansia so panagbilay diman tan tuloy so pantrabaho da.
