DAGUPAN CITY- Doble so irap natan na sakey ya pamilya diad baley na Mangatarem, Pangasinan kasumpalan ya napoolan so abong ya panlalamayan na padre de pamilya.
Diad exclusive interview na Bombo Radyo Dagupan, kinumpirma nen FO1 Ken Daryl Plor, duty officer na Bureau of Fire Protection (BFP) Mangatarem, agawa so pool diad Brgy. Bugtong Pulong no iner nagnap ya apoolan so abong nen Melissa Valdez, bangbalet masuwerte met ya nipaway so bangkay ya lalamayan tan anggapo met so asugatan.
Posibleng electrical wiring so makasengeg na pool tan unliligadad P300,000 so inisyal ya danyos .
Ibabagan ginmapo so pool diad sala na abong anggad binmuyak metla so apoy diad interon abong.
