Nakatakdang isumite ng House prosecution panel ang kanilang formal offer of evidence sa impeachment court bago ang nakatakdang deadline bukas, Biyernes, Oktubre 23, ayon kay Batangas Rep. Gerville Luistro.
Kasunod nito, magkakaroon ang kampo ni Vice President Sara Duterte ng 10 araw upang magsumite ng komento o pagtutol sa mga ebidensiyang iniharap ng prosekusyon.
Kabilang sa mga ebidensiyang inilahad ang mga rekord sa bangko, buwis, at korporasyon na may kaugnayan sa mga alegasyon ng unexplained wealth laban sa Bise Presidente.
Ang pagsusumite ng formal offer of evidence ang inaasahang magtatapos sa presentasyon ng ebidensiya ng prosekusyon bago ang susunod na yugto ng impeachment trial.
Nangako rin si Luistro na isusumite sa Office of the Ombudsman ang mga ebidensiyang nakalap laban sa Bise Presidente, at iginiit na hindi masasayang ang mga ito sa kabila ng pag-atras sa tatlo sa apat na artikulo ng impeachment.
Samantala, itinanggi ni House impeachment spokesperson Robert Ace Barbers ang mga alegasyong minamadali ang impeachment trial ni Vice President Sara Duterte bago ang nakatakdang pagbisita ni US President Donald Trump sa Pilipinas para dumalo sa ASEAN summit.
Ayon kay Barbers, nakabatay sa napagkasunduang iskedyul ng prosekusyon at depensa ang paglilitis matapos ang pre-trial conference kung saan tinalakay ang mga testigo at ebidensiyang ihaharap.
Nakatakdang magpatuloy ang paglilitis sa Nobyembre 9 matapos alisin ang tatlo sa apat na impeachment article.
Iginiit ni Barbers na walang halong pulitika ang paglilitis at layunin lamang nitong panagutin ang mga opisyal ng pamahalaan, habang inihayag naman ni Rep. Luistro na wala silang kapangyarihang madaliin ang proseso ng impeachment trial.
