Tinalo ng Alas Pilipinas Girls ang world No. 22 Czechia, 21-25, 25-22, 25-14, 25-22, upang makuha ang makasaysayang ika-15 puwesto sa 2026 FIVB Girls U17 World Championship nitong Linggo sa Santiago, Chile.
Dahil sa panalo, naging pinakamataas na puwesto ng isang Philippine national volleyball team sa world championship ang kanilang pagtatapos.
Nalampasan nila ang ika-19 na puwesto ng Alas Men sa 2025 FIVB Men’s World Championship sa Maynila.
Nanguna si 16-anyos Caera Celis sa Alas Girls matapos gumawa ng 25 puntos, kabilang ang 20 attacks, apat na aces, at isang block.
Nagdagdag naman si Jhaynna Bulandres ng 15 puntos.
Sa fourth set, nagtabla sa 17-17 bago pinangunahan ni 14-anyos Sharina Lleses ang isang mahalagang 3-0 run ng Pilipinas. Dahil dito, umabot sa 23-19 ang kalamangan ng Alas Girls.
Hindi naman sumuko ang Czechia at nakalapit sa 22-23. Ngunit naging matatag si Celis sa mga huling puntos.
Nagawa niyang ilagay ang Pilipinas sa match point, 24-22, bago siya muling tumira para tuluyang isara ang laban.
Nagtapos ang Alas Girls sa 2-3 record sa Pool B. Natalo man sila sa South Korea sa Round of 16 at hindi na umabante sa title race, nagtapos sila sa kasaysayan bilang pinakamataas na puwestong Philippine volleyball team sa world stage.
