Dagupan City – Nakapagtala ang lokal na pamahalaan sa iba’t ibang bahagi ng Pangasinan hinggil sa pagbawas ng hanggang 50 porsyento sa pondo para sa gasolina na ginagamit ng mga mobile unit ng kapulisan.
Ang hakbang na ito ay bahagi umano ng mga cost-cutting measures ng ilang LGU upang maayos na maipamahagi ang kanilang limitadong badyet sa iba pang mahahalagang serbisyo.
Gayunpaman, nagdulot ito ng agarang epekto sa operasyon ng pulisya, partikular sa kanilang kakayahang magsagawa ng mas malawak at mas madalas na pagpapatrolya sa mga nasasakupan.
Ayon sa mga opisyal ng pulisya, bagama’t nananatili ang kanilang mandato na tiyakin ang kaligtasan at kaayusan ng komunidad, kinailangan nilang mag-adjust sa kanilang mga estratehiya upang mapanatili ang police visibility sa kabila ng kakulangan sa pondo.
Sa ilang lugar, nabawasan ang paggamit ng mga patrol vehicle at mas pinagtutuunan ng pansin ang mas episyenteng deployment ng mga tauhan.
Sa kabila nito, may mga bayan naman na hindi apektado ng nasabing pagbabawas. Patuloy nilang nagagamit ang mga patrol na sasakyan at mga motorsiklo para sa regular na pagpapatrolya at agarang pagtugon sa mga insidente.
Samantala, binigyang-diin ng pamunuan ng Pangasinan Police Provincial Office (PPO) na nauunawaan nila ang layunin ng mga LGU sa pagpapatupad ng pagbawas sa pondo, lalo na kung ito ay bahagi ng mas malawak na hakbang sa pagtitipid.
Gayunpaman, plano nilang makipag-ugnayan at makipagdiyalogo sa mga lokal na opisyal upang mapag-aralan ang posibilidad na maibalik o madagdagan ang alokasyon sa gasolina, nang sa gayon ay hindi makompromiso ang seguridad ng publiko.
