Hiniling ng Independent Commission for Infrastructure (ICI) sa Department of Justice (DOJ) ang paglalabas ng Immigration Lookout Bulletin Order (ILBO) laban sa ilang kilalang personalidad, kabilang sina House Speaker Martin Romualdez, Senador Chiz Escudero, Senador Jinggoy Estrada, dating Senador Bong Revilla, dating Senadora Nancy Binay, at Congressman Arjo Atayde, kaugnay ng nagpapatuloy na imbestigasyon sa umano’y maanomalyang flood control projects sa iba’t ibang bahagi ng bansa.
Ayon sa ICI, mahalagang agad mailabas ang ILBO upang matiyak na ang mga iniimbestigahan ay hindi makalalabas ng bansa habang isinasagawa ang masusing pagsisiyasat.
Bukod sa mga nabanggit, may iba pang personalidad mula sa sektor ng gobyerno at pribadong kumpanya ang isinasangkot sa isyu, bagama’t hindi pa inilalantad ang kanilang mga pangalan sa publiko.
Kabilang sa mga ibinabato umanong paratang ay ang ghost projects, overpricing, at maling alokasyon ng pondo para sa mga flood control program sa ilalim ng iba’t ibang administrasyon.
Wala pang opisyal na pahayag ang mga mambabatas at personalidad na pinangalanan sa kahilingan ng ILBO.
Gayunpaman, inaasahang magsasalita sila sa mga susunod na araw upang tugunan ang mga akusasyon.
Nilinaw ng DOJ na ang ILBO ay hindi katumbas ng hold departure order, ngunit nagbibigay abiso sa Bureau of Immigration (BI) na bantayan ang galaw ng mga nasasangkot habang tumatakbo ang imbestigasyon.
Kapag nakitaan ng sapat na ebidensya, posible ring maghain ng kaso laban sa mga sangkot.
