Nakapaghatid na ng tulong ang Department of Social Welfare and Development (DSWD) sa mga pamilyang matinding naapektuhan ng nagdaang bagyo sa Barangay Lasip Grande, Dagupan City.
Kabilang sa ipinamahagi ang family food packs na naglalaman ng mga pangunahing pagkain gaya ng bigas, de lata, at instant noodles. Tumutok ang pamamahagi sa mga lugar na pinaka-nangailangan, lalo na yaong mga nasalanta ang kabuhayan o nawalan ng tirahan.
Habang isinasagawa ang relief operations, nakaalerto naman ang lokal na pamahalaan sa posibleng epekto ng Tropical Storm Paolo na inaasahang magdadala ng pag-ulan sa malaking bahagi ng Luzon sa mga susunod na araw.
Mahigpit na mino-monitor ng barangay ang lagay ng panahon, lalo na’t posibleng magdulot ng pagbaha at panibagong pinsala ang paparating na bagyo.
Sa kabuuan, patuloy ang koordinasyon ng barangay sa national agencies para matiyak na may sapat na suporta ang mga residente, hindi lamang sa relief goods kundi pati sa paghahanda sa mga susunod na kalamidad.
