Mga kabombo! Ikinasal na ang Ben&Ben keyboardist na si Pat Lasaten at lead bassist na si Agnes Reoma.
Makikita sa social media post ni Pat ang pagsasapubliko sa naganap na pag-iisang dibdib nila ni Agnes sa Los Angeles, California, nitong Lunes [November 18, 2024].
Sa wedding, parehong nakasuot ng puting wedding gown ang dalawa nang mangako silang aalagaan at mamahalin ang isa’t isa.
Bakas din sa social media post ni Pat ang kanyang kasiyahan dahil sa ganap na ngang mag-asawa—si Agnes na itinuturing din niyang “best friend.”
Intimate din ang naging kasalan ng dalawa, na dinaluhan ng kanilang pamilya at ilang malalapit na kaibigan.
Kabilang na rito ang kanilang mga kabanda sa Ben&Ben na sina Paolo at Miguel Benjamin, drummer na si Jam Villanueva, at percussionist na sina Toni Muñoz at Andrew De Paon.
Noong December 31, 2022 nang isapubliko nina Pat at Agnes ang kanilang engagament na nangyari pa noong July 2022 matapos ang mahigit walong taon nilang relasyon bilang magkasintahan.
At noon namang 2014 nang magkrus ang landas nina Pat at Agnes nang ipakilala sila sa isa’t isa ng isa sa kanilang common friend.
