Mga kabombo! Ano ang gagawin mo kung makakita ka ng isang sinkhole?
Gulat na gulat ang mga residenteng nakasaksi sa Romania matapos na mahuli-cam ang pagguho ng kalsada at “nilamon” nito ang isang kotse, ang nakakalungkot pa, kasama dito pati ang bata na kalalabas pa lang mula sa nasabing sasakyan.
Sa video, makikita na ipinarada ng ginang ang kotse sa gilid ng daan para ihatid sana ang kanilang 5 taong gulang na bata sa paaralan.
Ngunit, sa hindi inaasahang pagkakataon, pagkabababa pa lang ng bata mula sa sasakyan, bigla nang bumigay ang kalsada at nahulog ang bata pati kasama na rin ang kotse.
Mistulang bangongot man ito sa ilan, ngunit para sa pamilya isa itong maituturing na himala at grasya.
Pagkatapos ng insedente, mabilis namang sumaklolo ang mga nakasaksi pero ang ginang ang naglakas-loob na pumasok sa sinkhole upang kunin ang kaniyang anak.
Hanggang sa isang lalaki na rin ang sumunod sa babae sa sinkhole hanggang sa ligtas na nilang nakuha ang bata at naiahon mula sa sinkhole.
Ligtas din na nakaahon mula sa sinkhole ang ginang na napaiyak nang makitang maayos ang lagay ng kaniyang anak.
Batay sa inisyal na imbestigasyon ng mga awtoridad, bumigay ang kalsada dahil sa erosion sa ilalim dulot ng lumang utility pipe. Nakadagdag din daw sa sitwasyon ang bigat ang garbage truck na nasa tabi ng kotse.
