DAGUPAN CITY– Unkekerew na hustisya so pamilya na sakey ya overseas Filipino worker (OFW) ya manlapud Australia ya inatey kasumpalan ya tinmaboy ya diad kotse.
Immuna ed saya, dakel so aki ambegya diad social media ya kakaaro tan kanayon na biktiman si Jerwin Roj Catugas Royupa, tubon Mancup, Calasiao Pangasinan.
Diad ekslusibon impituyaw na Bombo Radyo Dagupan ed kinen Jossa Jey Royupa , say agi nen Jerwin, impalapag ton mansasansian kwestyunable ed sikara so agawa ed kapamilya to.
Inkuwanton, agga ra kumbinsidon ed ‘police report’ ya impasabi diad sikara no iner inatey so agi da lapud intaboy to ed unaandar ya kotse ya maples so pabatik.
Anggapo konoy nanenengneng dan rason pyan untaboy iya tan pateyen toy sarili to.
Iinapen dani konoy agi ton walay ginawa ton aliwa kanyan saya so tinmakas diad panamegley na intaboy yo diad niluganan ton kotse.
Antes ni kono so agawan insidemye so imbaga ed sikara nen Royupa ya saya so mamaltratuen na say amo yo.
Aga iya kono pasusuwelduan tan mabetbet ya papateyan na kuryente tan wifi diad abong aya tutuluyan to.
Emosyunal met ya unkekerew na pinansyal ya tulong manlapud saray makankanepegan so pangluwan ya agi nen Royupa ya labay ton personal ya unla diad Australia ta pian naantaan so tuwan inkagawa ed kinen Jerwin.
Maniilalo yan aksyunan yan tampol na say gobyerno piyan naisempet la dya diad Pilipinas so bangkay na biktima.
Akabatan ya sakey bolan labat ni diad Australia si Jerwin tan sa nen Marso 14 iya inatey.
