DAGUPAN CITY – Akapangikurit na duwaran kaso ng indiscriminate firing diad luyag na Pangasinan diad inpangabet na balon taon.
Diad plimiron agew na 2019, asugatan so 63 anyos ya kinabat ya si Rodolfo de Guzman,kasumpalan ya naknay ligaw na bala diad San Carlos City.
Onong ed impormasyon na aray otoridad, manpaputok komon so biktima diad arapan na abong da diad barangay Turac nen biglan tamaan na ligaw na bala diad taklay to bandad 12:03 na palbangon.
Awiten so bala diad forensic laboratory pian eksaminen.
Legan ya say sakey nin kaso na stray bullet incident so naikurit diad baley na Basista ed samay Bisperas na pangabet na balon taon.
Kinabat so biktima ya si Jose Marie Baniqued, 29 anyos ya residente na Brgy. Malimpuec.
Say biktima so akena diad bikking ya tinmagos diad pueg to.
Tampol met ya inawit diad ospital so biktima.
Kaleganan tonya, sakey ya security guard ya kinabat ya si Armando Ancheta, 41 anyos so inaresto na saray otoridad lapud inpanpaltog na service firearms to diad baley na San Nicolas.
Say suspek so insegepan metla na kaso.
