DAGUPAN CITY – Agla inmabot ya mabilay diaad patambalan so sakey ya bente uno anyos ya laki kasumpalan ya pantolongan ya bogbogen diad bayan na Umingan, Pangasinan pigaran oras antes na inloob na balon taon.
Kinabat so biktima ya si Marvin Lazo, 21 anyos, residente na Barangay Amaronan diad abitlan baley.
Onond ed imbestigasyon na saray otoridad, say insidente so agawa diad abitlan barangay no iner legan ta akalugan si biktima diad motosiklo to kaiba so kaaro to nen sila so sabaten na grupo na saray lalaki ya puros akainom.
Pinantolongan ya binogbog so biktima.
Apaandar toninya so motorsiklo to pian natakasan iray nambogbog diad sikato bangbalet nen akaarawi na pigaran metro so nakalaan na liknaan o nalemay.
Inawit si Lazo diad ospital bangbalet sikatoy indeklaran dead on arrival na aray doktor.
Kaleganan tonya, sakey ed saray suspek ya kinabat ya si Steve Inocencio, 21 anyos, residente met diad abitlan lugar so naaresto na aray otoridad tan akagetar ya segepan na kason murder.
Onong ed saray otoridad, say aga inpantalusan ed agni antan rason so nenengnengen ya motibo na abitlan insidente.
