DAGUPAN CITY-Inatey so 70 anyos ya laki kasumpalan ya mi sex ed sakey ya entertainer na Videoke Bar diad baley na Asingan, Pangasinan.
Kinabat so biktima ya si George Martinez Sr. 70 anyos, sakey ya jeepney driver tan residente na Brgy. Ariston West diad abitlan baley.
Diad impituyaw na Bombo Radyo Dagupan ed kinen Police Chief Inspector Ador Tayag, hepe na Asingan PNP impalapag ton kakasumpal
labat ya amasada so biktima nen anonotan ton dinmalan tan linma diad sakey ya videoke bar diad lugar da.
Diman to akabat so sakey ya Jackielyn Cabaguing, bente kwatro anyos tan entaertainer na Love Videoke Bar.
Umpapaway diad imbistigasyon na pulisya ya intagar na biktima so abitlan marikit diad abong da piyan man-sex.
Kasumpalan na pigaran oras et bigla labat ya nairapan ya makaingas so biktima anggad saya so nalmay.
Nan-apuran pinmaway diad abong so marikit piyan unkerew na tulong.
Inbatik ni diad ospital so biktima bangbalet indeklaran dead on arrival.
Manpapatuloy ni so gagaween ya imbistigasyon na saray otoridad ed abitlan insidente.
