Dagupan City-Inmabot la ed walora so bilang na indibidwal ya aputukan diad probinsya na Pangasinan.
Base iya ed sangkaunuran ya monitoring na Pangasinan Provincial Health Office o PPHO no iner animera dia so ‘active user’ o sikara mismo so nanpaputok legan ya say duwara so aksidenten atamaan.
Onong ed kinen Dra Anna Marie De Guzman Provincial Health Officer diad luyag, naikurit so abitlan bilang manlapid Disyembre 21 anggad kaplesan mas atagey kumpara nen apalabas ya taon no iner taloran bilang labat so kompirmadon aputukan.
Posible met ya untagey niya kasabi na balon taon.
Kaleganan tonya, impalapag na opisyal ya kaslakana lan say panlalapuan na injury iray napuputukan na Piccolo,Kwitis, Boga tan baby rocket—saray paputok ya isesebel na gobyerno.
