DAGUPAN CITY– Unaarap ed kason parricide so sakey ya mister kasumpalan ya aksidenten apaltog toy sarili ton misis legan ya manpapraktis ed pankablit na gatilyoy paltog diad ciudad na Alaminos.
Kinabat so biktima ya si Jennifer dela Cruz, 45 anyos legan ya kinabat so suspek ya si Christopher dela Cruz, 44 anyos.
Akagamor na kenay bala diad ulo so biktima tan inatey la legan ya tatambalen diad Western Pangasinan District Hospital.
Onong ed nalan impormasyon agawa so insidente kaleganan ya manpapraktis ya paputuken na suspek so cal 9mm pistol ya say pakaanta to nakal lan amin so bala to.
Biglan inmalingawngaw so maksil ya putok na paltog ya dugan nala diad ulo so misis to.
Tampol ya inbatik diad ospital so biktima kaleganan ya inaresto na saray pupulis so suspek.
