Balon kapanyanak ya ogaw ya bii, intilak diad loob na sakey ya simbaan diad Dagupan City

DAGUPAN CITY– Sakey ya balon kapanyanak ya ogaw ya bii so intilak diad loob na Saint John Evangelist diad ciudad na Dagupan.

Sakey ya nurse ya mimisa so akaimano ed sakey ya abalkot na kawes ya ungagalaw diad yurungan tan nen saya so singgeran to anengneng to so abitlan ogaw ya akalamping.

Tampol ton inawit iya diad ospitan pian nacheck up.

Umpapaway ed imbestigasyon ya posibleng intilak so ogaw nen nanlukas so simbaan ala-4 na palbangon.

Onong ed saray otoridad, unarap ed kaso so toon angitilak na sayan ogaw.

Panaralan na saray otoridad iray cctv camera diad lugar piyan naaantaan no siopa so angitilak na ogaw.

Inpalima metla so ogaw diad City Social Welfare and Development Office.