DAGUPAN CITY– Bangkay la nen nalmo so duwaran menor de edad ya nalner kasumpalan dan beltangen so ilog diad baley na San Fabian, Pangasinan.
Onong ed saray otoridad, saray empleyado la na Coast Guard tan MDRRMO diad abitlan baley so akarekober ed laman na biktiman si Angel Uson, samploy taon anyos, residente na Barangay Bolasi diad baley na San Fabian, legan ya sakey ya managsigay so akanengneng ed manleletaw ya laman na biktiman si Mary Jane Biay, trese anyos tan residente met diad Barangay Bolasi.
No nanonotan, say duwara kaiba so sakey ya menor de edad ya kinabat ya si Micah Janell Aquino, trese anyos, so binmeltang diad ilog ya mankokonekta ed barangay Sobol tan Barangay Nibaliw East diad baley na San Fabian bangbalet sikaray inyanor na maksil ya agos na danum anggad akakar irad aralem ya parte na ilog.
Akaligtas si Aquino ta agawaan top so akalangoy papawil diad gilig na ilog, bangbaley inatey so duwaran kaiba to.
Nangawa na search and rescue operations iray otoridad bangbalet agda tampol anengneng so laman daranya.
