Pigaran pinoy diad HongKong, nanbaga ra na aranasan dad bagyong Ompong; aray establisyemento ginmalaw diad kasil na dagem tan uran

DAGUPAN CITY– Impalapag diad Bombo Radyo Dagupan na pigaran Pinoy diad HongKong so aranasan dad bagyon Ompong o walay international name ya Mangkhut.

Diad eksklusibon impituyaw na bombo Radyo Dagupan ed kinen Gloria Llamedo ya kaplesan ya walad New Territories, HongKong, imbaga ton manlapud 49th floor ya kulaan to, nanengneng so pansasayaw na saray establisyemento legan ya unbabagyod lugar da.

Mangiwgiw iya ed nerbiyos tan nanaelew ed impakanengneng to.

Immuna lan angiter na abiso so HongKong government ed saray residente ya mansansiad kaabungan tan tampol ya pinaalis iray manayam asingger diad dayat.

Kanselado met so amin ya klase na transportasyon diad Hongkong tan masakbay met ya nansara iray negosyo.