DAGUPAN CITY– Unkekerew na hustisya so ina na apatey ya balolaki diad checkpoint ya kinabat ya si Joshua Laxamana, 17-anyos ya tubon Tarlac City.
Onong ed say ina ton si Tina Laxamana, August 14 na sayan taon nen sampot ton anengneng diad abong da so anak to angga nen untombok iran agew so agtola asabian tan akabatan ton linma iya ed ciudad na Baguio kaibay kakaaro to piyan unsali ed DOTA gaming tournament.
Apalabas so taloran agew, sinmabi so sakey ya kaaro ton manngaran na Deo tan inistorya ton akasabi rad Baguio diad panamegley na insabit dad sakey ya truck balet nen pasempet lara, tinmunda ira diad baley na Pozorrubio tan inaya toray duwaran kakaro ton sikara di Joshua tan Julius Sebastian pian manpainawa na magano balet agga ra inmaboloy lapud labay dala so makasempet ya tampol.
Say pakaanta nen Deo so aka una lan sinmempet so duwara ton kaaro balet abigla labat iya nen akabatan ton agla ra manaya akasempet.
August 20, nen dinmulog si Laxamana diad kuwerpoy pulisya tan nanpa-flash alarm ya nababalang so anak to.
Kaimbuasan, bandad alas diyes na kabuasan so linma so sakey ya brgy. tanod ed pantratrabahuan to tan impakabat ton walay arumog ya bangkay diad Pangasinan tan akumpirman anak to so bangkay ya apat agew lan walad morgue.
Nen nakatongtong na sayan misis iray pupulis diad luyag na Pangasinan, ikuwandan say anak to so akalugan diad motorsiklo, linmaban diad checkpoint, nalaan na droga tan armado na paltog balet imburi na say ina to.
