DAGUPAN CITY– Impasiguro nen Dagupan City mayor Belen Fernandez ya anggapoy formalin na saray sira ya ilalako diad ciudad.
Onong ed kinen Fernandez diad impituyaw na bombo radyo Dagupan, malet so monitoring ng City Agriculture Office tan Bureau of Fisheries and Aquatic Resource o BFAR ed saray unloloob ya sira diad wet market na ciudad piyan nasiguron amin ya siran ilalako ed saray tindaan so ligtas ya kanen. Partikular ya malet ya iinspeksyunen iray imported ya sira.
Umpapaway met diad datos na BFAR ya aggapoy formalin na saray sira diad luyag na Pangasinan.
Nilinew ton kakargaan na yelo iray sira piyan namintina so pagmaliw ya tariwa na sira.
Ginawa nen Fernandez so palapag kayarin pinmaway so balitan posiblen wala ray imported ya galunggong ya kinargaan na formalin.
Say makasamal ya formalin o formaldehyde, so uusaren na pigaran negosyante tan managlako piyan i-preserba tan pansansyaen ya tariwa so lako da.
