DAGUPAN CITY– Malet ya babantayan na Municipal Agriculture Office na baley na Mangaldan so impatey na saray pigaran alagan manok diad baley da.
Onong ed kinen Merly Cuison, Municipal Agriculturist diad abitlan baley, inkuwanton unaabot ed masolok ya sanlasus tan limamplon manok diad barangay Guesang so awalaan na Newcastle’s Disease onong metla ed inpaneksamin ya ginawa diad laboratoryo na Department of Agriculture ed baley na Sta. Barbara diad saray samples ya inpawit da.
Inkuwan nen Cuison, ya kaslakan na saray inateyan na manok so man-aabay ya pamilya tan binagaan metlaran ma-disinfect piyan agla untayak so sakit.
Onong ed si Cuison, saray backyard raiser labat na saray manok so naapektuan na abitlan sakit.
Diad kaplesan patuloy so gagaween ya pan-liliber da tan impasiguro ton susto so bakuna parad saray manok ya inter ed sikara na Provincial Veterinary Office.
