DAGUPAN CITY– Inalerto la na PNP Region 3 so amin ya police stations diad nasasakupan da tan saray kaabay dan probinsiya kasumpalan na impamatey ed kinen General Tinio, Nueva Ecija Mayor Ferdinand Bote.
Immuna ed saya, pasado alas-5:00 niman na ngarem nen tambangan so mayor na saray agga kabat ya suspek legan ya akalugan ed SUV.
Anggaman untan, agga nanpa interbyu na live, diad impituyaw balet na Bombo Radyo Dagupan ed kinen PSSupt. Eliseo Tanding, Provincial Director na probinsya, impalapag ton on-going ni so imbestigasyon diad insidente.
Diad sayan labi so walay meeting na saray kabiangan na PNP no iner kaiba si CSupt. Amador Corpus, Regional Director ng PNP Region 3.
Akabatan ya naawit nin tampol so biktima diad MV Gallego Hospital bangbalet saya so indeklaran dead on arrival.
Say insidente so agawa sakey agew so linmabas kayari na inpamatey met ed kinen Tanauan, Batangas Mayor Antonio Halili .
