DAGUPAN CITY– Personal ya dinmulog diad Bombo Radyo Dagupan so agi na sakey ed saray dinukot ya empleyado na Region 1 Medical Center (R1MC) diad ciudad na Dagupan piyan kerewen ed saray nandukot ya pasempeten da la.
Diad eksklusibon impituyaw na Bombo Radyo Dagupan ed kinen Jenny Decano, agi na sakey ed saray dinukot na saray armadon lalaki ya si Rizaldy Decano, say imbaga na asawa na biktima ed sikato, linmoob ni Rizaldy diad ospital balet akaawat na tawag so hipag to manlapud sakey ya barangay kagawad diad Lucao ya mangibabagan anengneng to so motorsiklo na biktima ed Medical Centrum diad Tambac.
Inkuwanton, tampol iran linmad R1MC tan nanbakasalin wadman so biktima balet anggapoy asabi dan Rizaldy tan magulo met laray empleyado na abitlan patambalan.
Mankelaw ira no akin ginawa iya ed agi to ta mao-maong iyan agi tan asawa tan anggapoy anta dan kasalanan o akakolkolan tan say katuwaan to et dakel so natutulongan tonya.
No nanonotan si Decano kaiba si John Mark Payaoan parehon walad suston edad tan residente na Lucao diad ciudad so sampot ya anengneng nen Marso 12 ya akalugan ed sakey ya na motorsiklo bangbalet bigla labat iran sinabat na sakey ya kolor gold ya starex tan linmeksab so anemeran lalaki tan tinutukan ira na paltog tan puwersan pinalugan irad loob na van.
