DAGUPAN CITY– Inatey so sakey ya trenta anyos ya laki kasumpalan ya pinapaltog diad baley na Mabini, Pangasinan.
Kinabat so biktima ya si Marlo Peralta, residente ng Barangay San Antonio diad siyudad ng Alaminos.
Umpapaway diad imbestigasyon ng PNP Mabini ya agawa so insidente diad Sitio Bakal, Barangay Poblacion, Mabini, no iner akalugan so biktima diad luluganan to nen sakey ya agga kabat ya laki so biglan sinmabi tan pinapaltog so biktima.
Akagamor so biktima na kenay bala diad nanduruman parte na laman to tan tampol ya inawit diad ospital bangbalet saya so dead on arrival.
Kaleganan tonya, arekober na saray otoridad diad akagawaan na insidente so labin duwan piraso na basyoy bala na caliber 45 ya paltog, kaiba so apatiran deformed slug na bala.
Tuloy so gagaween ya imbestigasyon na saray otoridad diad abitlan insidente, untan met kakabaten so suspek ya maples ya tinmakas kayari na impamaltog ed sikato.
